O BNG de Vigo reclamou ao Concello a posta en marcha dun plan municipal dotado de 9,5 millóns de euros para frear os desafiuzamentos na cidade. Segundo os datos xudiciais do último trimestre de 2025 recollidos polo Bloque, rexistrouse unha media de case seis desafiuzamentos á semana. Os nacionalistas lamentaron que estas cifras evidencian unha “emerxencia habitacional” que afecta, na súa maior parte, a familias e persoas empobrecidas que non poden afrontar os prezos do aluguer, os cales subiron un 9% no último ano e un 35% desde 2020.

O portavoz local do BNG, Xabier Pérez Igrexas, sinalou como o máis alarmante que a “práctica totalidade” destes desafiuzamentos se produciron sen que ningunha administración pública, nin a Xunta nin o Concello, facilitase unha alternativa habitacional accesible. Pérez Igrexas cualificou os lanzamentos como a cara máis dramática dunha crise que expulsa da cidade a familias enteiras e á mocidade. Así mesmo, criticou que o Goberno local deixe máis de 100 millóns de euros sen executar mentres a cidadanía perde as súas casas.

Ante esta situación, o Bloque propuxo a creación dun programa municipal de alternativas habitacionais, un plan de axuda ao aluguer e o reforzo da empresa municipal de vivenda. Con estas medidas, a formación nacionalista busca que o Concello ofreza solucións directas aos afectados e asuma un papel activo fronte á subida de prezos e a falta de recursos públicos para garantir o acceso a un fogar na cidade de Vigo.