Alexandra Fernández, deputada de En Marea pola provincia de Pontevedra, pedirá a comparecencia no Congreso do ministro de Fomento, José Luis Ábalos, para que dea explicacións polo miúdo da situación do proxecto da saída sur de Vigo.
A deputada mantivo este luns unha xuntanza co secretario xeral do Eixo, Xoán Vázquez Mao, para interesarse polo estado das infraestruturas da Eurorrexión ao fío da reunión que este tivo co secretario xeral de Infraestruturas do Ministerio e na que se puxo de manifesto a ausencia de datas marcadas para avanzar nos proxectos.
O secretario xeral detallou os resultados da reunión celebrada a pasada semana en Madrid, cos temas prioritarios para o Eixo Atlántico enriba da mesa, entre os que se atopan a saída sur de Vigo e o Corredor Atlántico.
A deputada explicou que o seu grupo leva traballando nos últimos meses na saída sur de Vigo e conseguiron o apoio do PSOE, pero de momento non hai resultados concretos. Así, de cara aos vindeiros orzamentos exixirán ao Goberno socialista compromisos. “Existe xa unha partida para o estudo previo da saída sur, e imos preguntar cal é o estado de cumprimento actual”, indicou Alexandra Fernández.
