A Cabalgata dos Reis Meigos de Vigo sairá o luns sobre as 18.00 horas da Avenida de Castelao e percorrerá Praza de América, Álvaro Cunqueiro e Camelias, para rematar na rotonda do Bicentenario, fronte á Praza do Rei. Así o confirmou este venres o alcalde, Abel Caballero, durante unha visita, no Instituto Feiral de Vigo, á montaxe das carrozas que comporán a comitiva dos Magos de Oriente.

A Cabalgata, que representará a “maxia e fantasía”, estará formada por 11 carrozas, das que seis son municipais (Policía Local, Bombeiros, Carteiro Real e as tres de Melchor, Gaspar e Baltasar). Así mesmo, haberá cinco carrozas de empresas colaboradoras e varios grupos de animación. Ao finalizar o percorrido, sobre as 20.00 horas, os Reis Meigos serán recibidos na Porta do Sol polo alcalde, de quen recibirán as ‘chaves da cidade’.

Desde alí dirixiranse aos nenos e nenas “para dicirlles que lles van traer moitísimos agasallos, porque foron moi bos”, recalcou Abel Caballero. Como se veu facendo nos últimos anos, haberá unha versión ‘estática’ da Cabalgata pola mañá, instalada na Avenida de Castelao, e que poderá visitarse de 11.00 a 14.00 horas.