A Xunta de Galicia trasladou por carta ao Concello de Vigo a súa disposición a aceptar unha nova tasación do Instituto Feiral de Vigo (Ifevi), tal e como esixe o alcalde Abel Caballero, co fin de “reforzar a transparencia e a confianza” entre todas as partes.
O conselleiro de Emprego, Comercio e Emigración, José González, subliñou que a administración autonómica non ten “ningún inconveniente” na nova valoración. Non obstante, a Xunta estableceu como condición que esta se acorde tamén coa Zona Franca, debido á intención do organismo estatal de entrar no padroado do Ifevi. Ademais, a Xunta advertiu de que o proceso non debe supoñer “frear nin atrasar” os traballos en marcha para a potenciación e o desenvolvemento do recinto feiral.
González, que reiterou a vontade de crear un modelo de gobernación tripartito para o Ifevi, proclamou que “A Xunta non entra en pelexas, entra en acordos”. O próximo paso será levar ao padroado a proposta dunha comisión de traballo para elaborar os plans estratéxico e funcional do recinto.
