A sección quinta da Audiencia Provincial de Pontevedra, con sede en Vigo, acollerá este martes un xuízo contra Pedro María M.O., como suposto autor dun delito de estafa nun falso aluguer de vivenda na cidade olívica. Dáse a circunstancia de que o acusado foi recentemente condenado por feitos semellantes e está inmerso en máis dunha decena de causas por estafas deste tipo.

Neste caso, está sinalada unha vista que xa estivo fixada para o pasado 17 de setembro, pero que tivo que ser suspendida ante a incomparecencia do procesado, que se atopa na prisión da Lama, e que non fora notificado. Os feitos, segundo o escrito de acusación, ocorrerían na cidade olívica en xullo do ano pasado, cando o acusado publicou na web inmobiliaria ‘Idealista’ un anuncio de aluguer dun piso. Ao velo, a vítima púxose en contacto co procesado, dicíndolle este que para reservar o piso tería que facerlle unha transferencia, “pero sen ter a vontade real de alugalo”.

“Con carácter previo, a denunciante remitiulle ao seu móbil un escrito no que ela se comprometía a abonarlle 750 euros en concepto de reserva e el, no caso de que o piso non fóra do seu alugado, debía devolverllos”, apunta o Ministerio público. Así, a prexudicada pagou 450 euros nun Bizum en concepto de aluguer de piso e outros 750 euros como fianza. A partir de aí, o acusado concertou varias citas coa muller para ver o piso, non aparecendo en ningunha, bloqueándoa finalmente para evitar recibir máis mensaxes dela.

Por estes feitos, a Fiscalía pide que sexa condenado a 3 anos de prisión, por un delito de estafa coa agravante de reincidencia (ten dúas condenas, unha de 2024 e outra de principios deste ano, á que se suma outra máis notificada nos últimos días, todas elas por estafas semellantes). Tamén reclama que pague unha multa de 3.000 euros e que indemnice á prexudicada en 1.200 euros.