O alcalde de Vigo, Abel Caballero, acusou á Xunta de Galicia de restar importancia á situación de seca na cidade e de pretender trasladar a idea de que “todo está normal” porque “quere que se consuma moita auga para que quedemos sen ela”.
Así o manifestou o rexedor olívico en declaracións remitidas aos medios, nas que alertou de que, neste momento, a cidade ten auga “soa para 100 días”. “Estamos nunha situación difícil“, advertiu, e sinalou que, segundo os datos de ocupación da presa de Eiras, o volume de auga embalsada é mesmo inferior ao destas datas en 2017, cando Vigo “estivo a piques de quedar sen auga”. “Todos lembramos a seca de 2017, pois estamos peor”, recalcou.
Por iso, censurou as declaracións da conselleira de Medio Ambiente, Ángeles Vázquez, que nas últimas horas aseguraba que o abastecemento estaba garantido aínda que non chovese ata xaneiro, unhas manifestacións que Caballero tachou de “falsas e extemporáneas”. Respecto diso, o alcalde criticou que a Xunta se atreva a garantir o abastecemento cando “non fixo nada”, xa que foi o Concello o que adoptou medidas, como a construción dunha nova potabilizadora ou e as restricións que operan desde agosto pasado para aforrar auga.
O alcalde de Vigo lembrou que o municipio de Baiona, que se abastece da presa de Zamáns está nunha “situación límite” e que o seu alcalde xa se dirixiu ao Concello olívico para pedir auga. “Pediuna a Vigo, non á Xunta”, salientou Caballero. Así mesmo, volveu a esixir que se reduza o caudal ecolóxico da presa de Eiras para embalsar máis volume de auga e afirmou que a Xunta traslada unha mensaxe de aparente normalidade e négase a reducir ese caudal “porque quere que Vigo quede sen auga”. “A mensaxe da conselleira é porque queren que se consuma moita auga e que quedemos sen auga”, aseverou o rexedor.
