O alcalde de Vigo, Abel Caballero, confirmou este sábado que o grupo socialista presentará no pleno do luns unha moción sobre Palestina na que expresan o seu apoio á petición do Goberno de España de recoñecer este territorio como Estado.

“Rexeitamos e condenamos contundentemente e con toda a nosa forza o xenocidio e a ocupación ilegal de Gaza e Cisxordania”, afirmou Caballero en declaracións aos medios.

O rexedor vigués indicou que a moción recolle a defensa das resolucións da ONU, o respecto ás fronteiras de 1967, o “apoio incondicional” á liberación de todos os reféns e o acceso “completo, seguro e sen restricións” da axuda humanitaria á poboación palestina.

CHAMAMENTO CONTRA O SILENCIO

Caballero advertiu de que “ninguén pode gardar silencio diante dun xenocidio desta envergadura e coa gravidade e o número de asasinatos que alí se están cometendo”. A moción socialista será debatida e votada no pleno municipal do vindeiro luns.