A conselleira de Vivenda e Planificación de Infraestruturas, María Martínez Allegue, confirmou ao alcalde de Vigo, Abel Caballero, que a Xunta financiará o 38 % do túnel de Elduayen con máis de 17,8 millóns de euros. Así o sinalou Allegue nunha carta remitida ao rexedor, despois de que Caballero lamentase que aínda non recibira confirmación oficial sobre este cofinanciamento, a pesar de que xa fora anunciada pola conselleira ante os medios de comunicación.

Na misiva, á que tivo acceso Europa Press, Allegue lembra que fai xa máis de cinco anos que o tráfico foi cortado na Porta do Sol de Vigo, estando a circulación nunha “situación provisional” ao non finalizarse a obra do túnel como se previu nun inicio. Por iso, sinalou a importancia de acurtar os prazos o máximo posible para restituír o tráfico na zona. Respecto diso, lembrou que Patrimonio Cultural xa informou favorablemente sobre o proxecto, tras a documentación remitida polo Concello o 9 de xullo.

“Isto permite que o Concello avance coa redacción do proxecto de execución definitivo, para así poder axilizar a materialización dunha actuación que é clave para a mobilidade na cidade, especialmente do transporte público urbano“, engade a conselleira. Entre outros temas, despois de propor unha reunión en setembro entre os técnicos da Xunta e do Concello, Allegue pediu a Caballero que poña data para a firma do convenio entre as dúas administracións e Zona Franca para a urbanización e o aparcadoiro subterráneo da ETEA. “O Consello da Xunta de Galicia autorizou a súa firma o pasado 19 de maio e desde entón estase esperando só pola súa formalización”, sentenza Allegue.