O dono do restaurante de Vigo que expulsou a turistas israelís da súa terraza acudiu na mañá deste martes a declarar ante o xuíz, esperándoo á porta da Cidade da Xustiza de Vigo unhas 200 persoas que o aclamaron e arrouparon á súa entrada e saída. Samir Slim, de orixe libanesa, foi citado polo Xulgado de Instrución número 4 de Vigo para declarar como investigado por un presunto delito de odio despois de expulsar da terraza do local a un grupo de turistas israelís.
Á súa saída, deu as grazas a todos os que acudiron a darlle mensaxes de ánimo, destacando e amosando o seu orgullo pola “marabillosa” cidade de Vigo, Galicia e España, onde reside desde hai anos. Ante os medios de comunicación, só confirmou que si respondeu ás preguntas que lle formularon e contou a súa versión dos feitos. Ademais, indicou que a outra parte non se presentou.
“Contei a miña versión, a parte que non se viu no vídeo. O vídeo é un minuto pero os feitos foron máis de media hora antes do vídeo”, subliñou, mostrándose “tranquilo” e dando de novo as grazas a todos aqueles que o arrouparon con berros de ‘Palestina libre’ e ‘Palestina vencerá’. Todo iso despois de que a Policía Nacional remitise a Fiscalía un informe sobre o sucedido a comezos deste mes de xullo nun restaurante de Vigo, por se se produciu ou non un posible delito de odio por parte do responsable do establecemento ao expulsar da terraza do local a un grupo de turistas israelís.
Foi el mesmo quen gravou un vídeo no que se ve como expulsa a un grupo que estaba a tomar algo na súa terraza, mentres lles afea que apoien a acción do seu goberno en Gaza. “Se matades palestinos, ide comer a Gaza”, recriminoulles mentres lles instaba a que se fosen do local, situado na zona do Arenal. O hostaleiro explicou que a súa reacción se debeu a que os clientes se estaban comportando de maneira agresiva e provocadora. De feito, no vídeo escóitase a algún dos turistas gritar ‘Viva Israel’, ao que o agora investigado respondeu ‘Viva Palestina libre’.
Ver esta publicación en Instagram
