SOS Sanidade Pública lamentou este martes a “oportunidade perdida” que, ao seu xuízo, supón a apertura do novo centro de saúde Olimpia Valencia de Vigo xa que, “non suporá incrementar profesionais, senón cambialos de sitio”. Nun comunicado, a asociación criticou que o novo ambulatorio significará o traslado do centro de saúde de López Mora (xa planificado polas condicións de espazo), o peche do centro de saúde Nicolás Peña e o traslado de parte de profesionais dos de Pintor Colmeiro, Coia, Cuba, Bairamar e Rosalía de Castro.
En concreto, entre os profesionais que se trasladarán ao novo centro estarán os de Pediatría, para “concentrar” a atención pediátrica nun só centro, “nun ensaio dun novo modelo organizativo que permite exclusivamente garantir a cobertura de ausencias entre profesionais do propio centro”. Isto, a xuízo de SOS Sanidade Pública, o que garante é a “precariedade asistencial continua” destes profesionais.
A organización tamén criticou que non se tivo en conta a participación de profesionais e cidadáns afectados á hora de planificar a apertura do Olimpia Valencia, “sen solicitar a opinión de sociedades científicas e profesionais, asociacións veciñais e outras entidades representativas“. Por todo iso, SOS Sanidade Pública volveu reclamar a ampliación do hospital Álvaro Cunqueiro, a reordenación asistencial da área urbana de Vigo e un plan de mellora da Atención Primaria que permita a súa “reconstrución”.
“MELLORA SUBSTANCIAL”
Ante estas declaracións, a xerencia da área Sanitaria de Vigo saíu ao paso, reivindicado que o novo centro de saúde Olimpia Valencia suporá unha “mellora substancial” na atención primaria da cidade, cunha asistencia “máis ampla, próxima e resolutiva”. Nun comunicado, a xerencia rexeitou as palabras da plataforma SOS Sanidade Pública, subliñando que tras un investimento autonómico de 16 millóns de euros, o novo ambulatorio, situado na rúa Lalín, reforzará a calidade da atención primaria, “con máis servizos sanitarios, mellores instalacións e un equipamento completamente renovado”.
“A reorganización de servizos aparellada á apertura deste novo centro responde o obxectivo lóxico de ofrecer unha mellor atención sanitaria á poboación de Vigo, a través dunhas novas instalacións e unha dotación de equipamento mellor e máis moderno”, indicou a área sanitaria. Isto permitirá, segundo explican, completar a carteira de servizos e dotar de novas prestacións como Fisioterapia, Odontoloxía, Farmacia, Traballo Social, Nutrición ou Matrona, “mellorando a calidade e a atención aos pacientes ao concentrar todos estes servizos nun único centro”.
En relación á reorganización da atención pediátrica, trátase, a xuízo da Xunta, dunha reorganización “funcional” para mellorar a calidade asistencial e garantir a continuidade dos coidados. “En ningún caso, por tanto, trátase dunha diminución de servizos nin da atención, senón dun sistema máis eficaz e beneficioso para a poboación, ao evitar desprazamentos entre consultas e mellorar o seguimento do paciente”, sentenciou.
