A Universidade de Vigo (UVigo) acolleu, por primeira vez na súa historia, a defensa dunha tese de doutoramento en linguaxe de signos, sendo á súa vez a primeira ocasión na que unha persoa xorda defende así o seu traballo en Galicia. Segundo recolle o diario da universidade (DUVI), xa se defenderon no centro distintas teses sobre lingua de signos española, pero ata agora nunca se defendeu ningunha nesta linguaxe.

A encargada de facelo foi María Luz Esteban Saiz, sociolingüista xorda con máis de 30 anos de traxectoria profesional e, desde agora, autora da primeira tese de doutoramento defendida na UVigo en linguaxe de signos, “unha investigación de gran alcance social na que se sitúa e pon de substitución a política lingüística da lingua de signos española desde 1980 ata a actualidade”. Dirixida pola catedrática María del Carmen Cabeza Pereiro, a tese defendeuse nun acto “tremendamente emotivo” no que a súa autora estivo arroupada por numerosos compañeiros, así como docentes que non quixeron perdela, segundo explica o DUVI.

“Espero que este acto axude a que máis persoas xordas se animen a doutorarse no campo da lingua de signos e os estudos xordos”, subliñou Esteban Saiz. “Como persoa xorda e defensora dos intereses da minoría xorda, optei por desenvolver unha perspectiva de investigación máis humanística, situando ás persoas xordas no centro do escenario, motivada polo desexo de utilizar esta tese como ferramenta para abordar a desigualdade social”, explicou a autora.