O Concello e a Universidade de Vigo crearán un Observatorio da Vivenda para facer un diagnóstico da situación na cidade e a súa área metropolitana. Así o anunciou o alcalde, Abel Caballero, nun audio difundido aos medios de comunicación.

O rexedor dixo que se iniciou a tramitación dun convenio para crear este Observatorio, despois de que o Concello encargase un estudo externo para a posible declaración de zona de mercado tensionado na cidade, na que se establecía como recomendación a creación deste observatorio.

Así, estudarase a evolución do mercado da vivenda e analizarase o acceso dos cidadáns á mesma. “Estudaremos tamén as diferenzas entre os barrios no acceso á vivenda e analizaremos o stock de vivendas, o custo e a situación do mercado de aluguer“, engadiu.