O grupo municipal do PSOE de Vigo rexeitou este luns debater unha moción de urxencia para dar explicacións sobre a tramitación dos permisos para a celebración de festas na cidade, tras a polémica coas autorizacións a feirantes e a comisións de festas, e subliñou que o goberno local fai cumprir a legalidade.
O grupo do PP presentara unha moción urxente para o seu debate no pleno ordinario deste luns, na que reclamaba explicacións polos problemas que están a ter as comisións de festas para celebrar os eventos. O portavoz do grupo ‘popular’, Miguel Martín, lembrou que o Concello negou autorizacións en base a unha normativa que xa o ano pasado estaba vixente, sen que se puxesen problemas para a instalación de atraccións.
Tras o anuncio da comisión de festas de Coia de que non podería celebrar os actos previstos, e o posterior acordo co Concello para levar a cabo as festas (co compromiso de que a administración local sufragará as perdas polas atraccións que non cumpran a normativa e non poidan instalarse), Miguel Martín preguntou que pasará co resto de eventos previstos, como as festas de Bouzas. “Pagará o Concello con fondos públicos a incompetencia do goberno local?”, cuestionou.
Finalmente, lembrou que “o que incumpriu a lei foi o propio Concello” o ano pasado, ao non revisar que as atraccións non autorizadas non se puxese en funcionamento. E lembrou que, entre elas, estaba o Saltamontes no que se produciu un accidente cun mozo falecido en agosto, unha atracción que o Concello “non precintou”. Pola súa banda, o BNG trasladou a súa posición favorable a debater esta moción, para que o goberno local dese “explicacións” sobre a tramitación dos permisos ás festas, e reclamou que o Concello “debe dar solucións e non crear máis problemas”.
Con todo, a proposta non foi debatida no seu contido finalmente, xa que o PSOE votou en contra da urxencia. O portavoz do goberno municipal, Carlos López Font, acusou ao PP de “estar situado na ilegalidade” e de “conspirar para que non houbese festas en Coia”. O edil socialista lembrou que finalmente haberá festexos en Coia e tamén se celebrarán o resto de eventos emblemáticos do verán vigués, “sempre dentro da legalidade”.
