A comisión organizadora das festas de Coia, en Vigo, deu por suspendida a celebración tras negar o Concello vigués autorización á mesma: “O que o ano pasado valía, este ano non lles vale”.
Así o sinalou en declaracións a Europa Press o presidente da Asociación Cultural Festas da Consolación de Coia, Manuel Carreira, quen lamentou a actitude do goberno local, que emitiu un informe desfavorable ao plan de autoprotección presentado pola comisión, solicitando á organización que “enmiende erros” para poder autorizar a festa.
Carreira dixo que o Concello lles deu cinco días de prazo, desde o pasado venres, para corrixir a documentación achegada, polo que “non teñen tempo”. Entre os requirimentos, esíxenlles aforar o terreo, algo “inviable” e que nunca fixeron por que non hai unha única entrada e saída do recinto.
Preguntado sobre se enviarán máis documentación, dixo que sería “perder o tempo” porque “buscarán outra escusa” para dicir ‘non’.
Sobre os motivos que levarían ao goberno local a tomar esta decisión, o presidente dixo que despois do accidente mortal ocorrido o ano pasado no Saltamontes de Matamá puxéronse “moi exquisitos” e “ven con lupa todo”. “O que o ano pasado valía, este ano non lles vale”, criticou.
Manuel Carreira lamentou esta circunstancia, debido a que as festas de Coia contan cunha tradición de máis de 100 anos de historia na cidade.
CONCELLO
Pola súa banda, o Concello de Vigo enviou un comunicado aos medios de comunicación informando de que o pasado venres se notificou á comisión o informe desfavorable ao plan de autoprotección presentado para as festas de Coia, emprazándoos a que en cinco días “enmienden erros”.
Todo iso, segundo o Concello, “por non reunir os requisitos mínimos para a súa tramitación nin aclarar varios dos aspectos básicos da normativa vixente en materia de autoprotección”.
“Os técnicos municipais consideran que a documentación presentada pola comisión non é válida nin suficiente para poder autorizar a celebración do evento”, engade o goberno local, dando cinco días para emendar os erros. “De non facelo, procederase a dar por desistida a petición”, sentenza.
PP LAMENTA A DECISIÓN DA COMISIÓN DE FESTAS DO BARRIO DE COIA
O PP de Vigo lamentou este martes, tras coñecerse a decisión da Comisión de Festas do barrio de Coia de suspender os festexos, que o alcalde “fixo todo o posible por cargarllas”, e denunciou que, detrás a negativa do Concello a autorizar a celebración, hai unha “errónea defensa da seguridade”.
En declaracións remitidas aos medios, tras enviar “unha mensaxe de ánimo” aos organizadores do evento pola “difícil decisión” que tiveron que tomar ao cancelar a festa, Luisa Sánchez denunciou que “se chega a este punto por culpa do señor Caballero, que se escuda nunha errónea defensa da seguridade para impedir a celebración destas festas por primeira vez nos seus cen anos de historia”.
Finalmente, avanzou que o grupo municipal do PP pedirá a comparecencia da concelleira de Seguridade, Patricia Rodriguez, ante o Pleno do próximo 30 de xuño “para que dea explicacións” e concluído insistindo que é “verdadeiramente triste que todos os concellos galegos sexan capaces de autorizar unhas festas de verán seguras e Vigo non”
“A este paso só quedará o Nadal (…), coincidencias da vida, mentres Caballero autoriza o Cíes Market e as atraccións contiguas, cárgase as festas de toda a vida”, sentenciou.
