A Asociación de Empresarios de Atraccións de Feira de Galicia (Emafega) denunciou o “veto encuberto” que, ao seu xuízo, leva a cabo o Concello de Vigo á instalación de atraccións nas festas da cidade: “Nós tamén temos familias que dependen desta actividade”. Nun comunicado, Emafega criticou que a día de hoxe, “a tan só uns días do inicio das festas grandes de Vigo”, moitas atraccións de feira non recibiron “ningún tipo de notificación por parte do Concello”. Un silencio administrativo que, segundo lamentan, impídelles saber se poderán “instalar, traballar ou simplemente exercer os seus dereitos como profesionais e contribuíntes”.
“Non é unha situación nova: desde que o ano pasado se produciu o tráxico accidente nunha atracción durante unhas festas en Vigo, o Concello adoptou unha postura de bloqueo institucional que, lonxe de mellorar os mecanismos de control, converteuse nun veto encuberto a toda unha actividade. E agora, con outra traxedia ocorrida recentemente en Murcia –unha nena falecida electrocutada por unha cama elástica sen toma de terra–, parece consolidarse unha mensaxe implícita: mellor non autorizar nada, polo si ou polo non”, apuntou a asociación. Para os feirantes, esta estratexia do goberno local “non é legal, nin ética, nin responsable”. “Non se pode falar de seguridade sen pisar o terreo: paralizar atraccións sen inspección é unha irresponsabilidade institucional”, engadiron.
Así, pediron ao Concello que notifique “en prazo e forma” as autorizacións solicitadas e que se respecte a validez xurídica dos certificados técnicos asinados por enxeñeiros, así como que se realicen inspeccións presenciais cando haxa dúbidas e non “vetos desde un despacho”. “Nós tamén queremos traballar con seguridade. Tamén temos familias que dependen desta actividade. Tamén queremos que as atraccións sexan revisadas e cumpran a normativa. O que non podemos aceptar é ser castigados sen ser o problema”, sentenciou.
ACCIDENTE MATAMÁ
Todo iso despois do ocorrido na madrugada do pasado 3 de agosto nas festas de Matamá, en Vigo, onde un home faleceu tras un accidente no Saltamontes. Precisamente esta semana saíu á luz que a Policía Local de Vigo alegou que non houbo orde “expresa” de clausurar o Saltamontes, que finalmente terminou coa vida do home. Con todo, un axente alertou case 24 horas antes dos feitos de que na bandexa de entrada do mail había un correo sen ler remitido por Seguridade da Concellaría da área de Goberno de Seguridade, Contratación, Festas e Xestión Municipal no que supostamente se desautorizaba a atracción.
As partes seguen á espera de que se resolva sobre a petición de investigación de máis presuntos responsables. Na actualidade só se investiga ao propietario da atracción sinistrada e ao presidente da comisión. Así, pediuse a comparecencia da concelleira de Festas, Patricia Rodríguez, e varios técnicos municipais, esperando que sexa a Audiencia Provincial de Pontevedra a que resolva estas solicitudes, tras denegalas a xuíza. Ademais, agora piden que testifique o oficial do corpo da Policía Local e os inspectores que puideron recibir o correo que non se leu.
