A xunta de goberno local de Vigo aprobou este venres a adxudicación do XI Programa de murais ‘Vigo, cidade de cor’, ao que destinará 450.000 euros para a elaboración de 11 murais en varias zonas da urbe olívica.
Segundo indicou o alcalde, Abel Caballero, cando termine esta nova edición, Vigo terá máis de 190 murais. Este ano, serán artistas de Arxentina, México, Polonia, Grecia e España, singularmente Galicia, os encargados de elaborar as obras.
En concreto, as novas obras recollidas nesta iniciativa estarán situadas na rúa Rola, 116, na zona de Casabranca; en Rosario Hernández Diéguez, 6 (Fátima); en Santa Tegra, 71 (zona de Guixar); nas pistas de baloncesto de Samil; en Palencia, 12 (Calvario); en Sanjurjo Badía, 184; na pista de baloncesto do parque Ricardo Aldao Román na Salgueira; na Asociación de Veciños de Cabral; en Montecelo Alto, 62 (Teis); en Travesía de Vigo, 138, e na rúa O Grove.
