O BNG e o PP de Vigo criticaron que o goberno local de Abel Caballero pretenda impor un “engano fiscal” no recibo do lixo e propuxeron bonificacións para frear esta subida.

Así, o portavoz do Bloque, Xabier Pérez Igrexas, ve “inaceptable” que o Concello “pretenda impor un engano fiscal sen contemplacións”, a pesar de ter recursos “suficientes” para alivialo.

Segundo el, Vigo ten un dos recibos de lixo “máis caros” de Galicia e de España, “superando os importes de cidades como Madrid, Barcelona ou Valencia”.

Nun comunicado, o Bloque pediu deixar atrás o modelo “obsoleto, contaminante e carísimo” de Sogama e propuxo un sistema baseado na recollida selectiva, a reutilización, a reciclaxe e o compostaxe.

Por iso, o BNG levará a próximas comisións informativas do pleno unha proposta para que o goberno municipal demande á Xunta a creación dunha comisión de traballo para definir un novo modelo de xestión de bioresiduos.

“Non se trata só de rexeitar un tarifazo inxusto, senón de dar o debate sobre como xestionamos os residuos, unha das grandes materias pendentes de Vigo”, explicou Igrexas.

PP E CABALLERO

Precisamente o PP tamén criticou o “engano” do recibo do lixo en Vigo, que se “disparará” até os 138 euros pola “conivencia” de Caballero con Pedro Sánchez, segundo o portavoz Miguel Martín.

El apuntou que este “incremento absolutamente desproporcionado” débese á nova lei de xestión de residuos impulsada polo Goberno.

Todo isto tivo resposta do alcalde, que enviou un audio aos medios de comunicación acusando ao PP de ser “cómplice” de Sogama e da Xunta da “estafa política da subida do canon” que se ten que pagar á empresa pública.

O rexedor lanzou unha proposta, indicando que se Sogama retira a subida “mañá”, Vigo baixará o recibo ata os 100 euros “mañá mesmo”.

Ante estas palabras, Martín volveu a contestar a Caballero, reivindicando que quen puxo o novo imposto foi o Goberno, polo que todos os españois teñen que pagar máis polo recibo do lixo. “O responsable non é Sogama, senón o Goberno central que impón esta suba que non queda máis remedio que aplicar”, lamentou.

Para el, a diferenza está en que mentres outros alcaldes se queixan, Caballero “tenta desviar o tiro para protexer a Sánchez” cun “bulo permanente”.