O alcalde de Vigo, Abel Caballero, insistiu este martes en reclamar unha facultade de Medicina propia para a Universidade de Vigo e para a cidade olívica, e afeou ao presidente da Xunta, Alfonso Rueda, que acepte o “centralismo” de Santiago tamén nesta cuestión. En declaracións remitidas aos medios, e tras repetir que Vigo é a única das grandes cidades do Estado que non conta con este grao, advertiu que o modelo dunha facultade única nunha comunidade con tres universidades “non o hai en ningún sitio de España”.

“Aquí Vigo é unha colonia de Santiago, e de novo Rueda acepta o centralismo mal levado adiante de que Santiago é a que manda”, criticou, e censurou que teña que ser a USC a que tome as decisións sobre o grao de Medicina ou sobre quen entra na Facultade, seguindo “a vella estrutura da Galicia mal deseñada”. Segundo o alcalde, o presidente da Xunta, ao aceptar esa situación, “de novo castiga a Vigo” e “defende o privilexio decimonónico para a Universidade de Santiago”. Por iso, insistiu en que o goberno galego ten que iniciar os trámites para implantar o grao na Universidade de Vigo, coa dotación orzamentaria necesaria.