O BNG rexistrará iniciativas nas Cortes do Estado para demandar a paralización da posta en marcha da torre de control remoto do aeroporto de Peinador, en Vigo. Tal e como trasladou nunha nota de prensa o deputado do BNG no Congreso, Néstor Rego, advertiu do “risco” de que esta infraestrutura poida centralizar o control dos aeroportos galegos, como o da Coruña (Alvedro), co que, apuntou, “implicaría en termos de seguridade e deterioración das condicións laborais do persoal”.
“A torre de control remoto de Vigo é un experimento tecnolóxico que non se adapta ás características complexas do tráfico aéreo da zona nin garante os niveis actuais de seguridade”, afirmou Rego, que incidiu en que “non se pode permitir que o afán de redución de custos de AENA degrade os servizos públicos aeroportuarios en Galicia”. Segundo a formación nacionalista, a torre remoto suporá unha redución “significativa” do campo visual de control e “xa se prevén restricións operativas na franxa horaria de 09.30 a 11.30 horas, que limitarán os voos simultáneos”.
Ademais, o Bloque advertiu de que o feito de que tanto o aeroporto de Vigo como o da Coruña teñan o mesmo concesionario privado do servizo, “alimenta as sospeitas de que a operación busca reducir custes mediante a concentración de persoal”, o que, apuntou, “tamén implicaría un incremento da carga de traballo e risco para a seguridade aérea“. Así, a iniciativa dos nacionalistas pide paralizar a posta en marcha da torre de control remoto no aeroporto vigués e abrir un proceso de diálogo co persoal técnico e sindicatos para avaliar a introdución do sistema de control remoto como un apoio “e non substitución das torres físicas”.
