Varios colectivos denunciaron este venres nos xulgados de Zamora un posible delito de prevaricación pola supresión de paradas de tren en Sanabria. Unión o Pobo Leonés (UPL), a asociación Viriatos, Terra Sustentable e Agricultores e Gandeiros Libres de Zamora presentaron unha demanda na que apuntan aos presidentes de Renfe e Adif, ao secretario de Estado de Transportes e ao alcalde de Vigo, Abel Caballero. Este último, “como instigador”.
Convén lembrar que, na reorganización de servizos exposta por Renfe, que entra en vigor este 9 de xuño, suprímense varias paradas na estación de Sanabria Alta Velocidade, situada na liña entre Madrid e Galicia, xa preto da fronteira entre Castela e León e Ourense. A decisión do operador ferroviario provocou distintas mobilizacións e as queixas veciñais ante a eliminación, en particular, das frecuencias matinais tanto de ida como de volta.
Ante esta situación, os colectivos asinantes da denuncia decidiron recorrer á vía xudicial, segundo explicou a avogada que presentou a demanda, Pilar Calvo, que explicou os pormenores á porta dos xulgados e que recalcou que a demanda inclúe a petición de medidas cautelares. É dicir, que mentres se dirime o asunto, os servizos matinais de Sanabria mantéñanse.
INTERESE PÚBLICO
Calvo falou, na súa explicación, das expropiacións necesarias para executar as obras da liña ferroviaria, do impacto ambiental do tren sobre a comarca, da construción da estación aberta en 2021 e da formulación actual do operador ferroviario: “Segundo o presidente de Renfe, en declaracións que fixo aos medios de comunicación, pecháronse as paradas de AVE en Sanabria por un motivo de interese público. O interese público leva uns trámites legais que esixen o trámite de audiencia aos interesados e tamén unha declaración de interese público por parte do Ministerio de Transportes que non se levou a cabo”, argumentou Calvo.
Para a avogada, esta é “unha decisión inxusta a propósito, co cal entraría dentro do presunto delito de prevaricación”. “Doutra banda, o tren ten unha vocación de servizo público e, neste caso, se se quitan frecuencias, o servizo público para o que está destinado non o leva a cabo”, dixo Calvo, que engadiu, ademais, que o Goberno compensa a Renfe e a Adif todos os anos por aqueles servizos que son deficitarios: 918 millóns en 2025. “Entón non ten sentido ningún, desde o punto de vista xurídico ou técnico, suspender estes”, insistiu.
