O Concello de Redondela pediu á Xunta de Galicia “respecto” á Illa de San Simón tras coñecerse a celebración dunha festa de bachata autorizada polo Goberno autonómico.

Nun comunicado, o goberno local lamentou que nin a Consellería de Cultura nin a Fundación Museo do Mar de Galicia, que xestiona a Illa, comunicasen ao Concello esta celebración, un espectáculo titulado ‘+Q Bachata’.

A alcaldesa, Digna Rivas, ve “indecente” que a Xunta “non promova” actividades para conservar a memoria democrática na illa e esixe o ingreso do Concello na Fundación para “participar, coñecer e opinar” sobre as actividades que se celebren na illa.

A rexedora considera “innecesario” que esta actividade se celebre nun sitio como San Simón, espazo declarado Lugar de Memoria Democrática. Ao seu xuízo, ofende por centos de familias vítimas da ditadura militar, da represión e da persecución, polo que solicitou a cancelación do acto.