O Goberno defendeu a seguridade da torre de control dixital do Aeroporto de Vigo, asegurando que ofrece “as mesmas condicións de seguridade” que unha torre convencional, e mesmo proporciona “máis información” aos controladores grazas á tecnoloxía incorporada. A resposta, emitida pola Secretaría de Estado de Relacións coas Cortes, contestaba a unha pregunta do PP, que expresara dúbidas sobre o novo sistema de videovixilancia que se implantará en Peinador.
Segundo o Executivo, o proxecto atópase en fase de tramitación e está previsto que o control aéreo comece a prestarse desde a torre dixital o vindeiro 11 de xuño, de forma gradual e con medidas de mitigación. O sistema, situado nun edificio anexo á terminal, será implementado por fases para garantir un traspaso “paulatino, conservador e en condicións de seguridade”, tal e como se fixo noutros aeroportos europeos onde xa se empregan tecnoloxías similares.
Ademais, o Goberno lembrou que o 99% das rutas aéreas realízanse sen control visual directo e que a maioría dos controladores xa operan sen ver fisicamente os avións. Respecto á paralización do proxecto dunha torre dixital en Menorca, precisou que se debe a que o sistema empregado alí é “completamente distinto” e segue en fase de probas, mentres que en Vigo as probas foron superadas con éxito e o sistema está listo para avanzar.
