O grupo municipal do PP no Concello de Vigo volveu reclamar este mércores a retirada da Medalla da cidade concedida á expresidenta de Adif, Isabel Pardo de Vera, agora investigada pola Audiencia Nacional por suposta malversación e tráfico de influencias. Os ‘populares’ xa solicitaran a retirada desta Medalla de Ouro de Vigo (concedida en 2022) a través dunha moción debatida no pleno ordinario do pasado 28 de abril. A súa proposta foi rexeitada polos votos contrarios da maioría do goberno local socialista, e coa abstención do BNG, que afirmou non compartir a concesión desa distinción pero rexeitou as motivacións esgrimidas polo PP.
Nese debate, o concelleiro do PP, Fernando González Abeijón, tachou de “humillante” que Pardo de Beira recibise esa Medalla, e a súa moción foi respondida os socialistas co cualificativo de “carroñera”, por “non respectar a presunción de inocencia” e pedir a retirada do recoñecemento en base a informacións que “apuntaban” a posible implicación da expresidenta de Adif en asuntos irregulares.
Agora, unha vez que se coñeceu a imputación (investigación xudicial) de Pardo de Beira, o PP reclamou ao alcalde, Abel Caballero, que “abandone a súa complicidade” coa exdirectiva de Adif, e retírelle a Medalla “que lle regalou”. “Isto deshonra e deteriora o valor da Medalla da Cidade que lle regalou Abel Caballero. Un recoñecemento que ten e mantén co apoio, a complicidade e o consentimento do PSOE vigués”, profundou González Abeijón.
O concelleiro do PP, ademais, fixo un paralelismo entre a investigación que afecta a Pardo de Beira (pola contratación aparentemente irregular dunha expareja do exministro José Luís Ábalos) e a causa xudicial polo ‘enchufe’ dunha cuñada de Carmela Silva nunha concesionaria municipal de Vigo, un proceso que acabou cun funcionario e un empresario condenados a penas de prisión. “Quizais por isto Caballero se lava as mans, porque co PSOE vigués empezou todo. Saben moi ben como vai iso de enchufar a persoas na administración, cobrando zumentos salarios sen nin sequera acudir ao seu posto de traballo”, proclamou.
