Delegados e delegadas da CIG concentráronse este martes ante as oficinas de Conxemar en Vigo para esixir que se retomen as negociacións do convenio colectivo estatal de produtos elaborados do mar. O sindicato anunciou que a próxima semana celebrarase unha asemblea do sector para decidir novas mobilizacións no caso de que a patronal non fixe unha data para unha nova reunión, e despois de que os representantes empresariais decidisen de forma “unilateral” anular o encontro previsto para este martes, sen dar data alternativa.

A CIG vincula esa decisión coa decisión do Goberno de tramitar pola vía de urxencia a redución de xornada, e sinalou que a patronal non quere sentar ata que non se tramite o correspondente Decreto. Respecto diso, advertiu de que, no marco desta negociación, hai que abordar moitas máis cuestións á marxe da xornada, como os salarios, permisos, pluses ou prevención de riscos laborais. “Non imos consentir que se castigue a persoas traballadoras sen convenio e sen actualización de salarios, polo que daremos unha resposta contundente á decisión de boicotear a negociación”, proclamaron desde a central sindical.