A Rede de Atención ás Adiccións (UNAD), xunto ás súas entidades socias Asociación Érguete e Fundación Érguete-Integración, e coa colaboración do Centro de Investigación en Dereitos Humanos e Políticas Públicas da Universidade de Salamanca (CIDH Diversitas) presentaron este luns en Vigo un proxecto para intervir en mulleres con adiccións vítimas de violencia de xénero.

A idea é implementar unha comunidade GPS (Xeradoras de Saberes, Participativas e Sociais) na rexión e abordar os casos de violencia de xénero e adiccións de maneira “pioneira e innovadora” a través da coordinación e da colaboración de axentes sociais procedentes de diversos ámbitos.

Baixo esta premisa, a comunidade GPS ofrecerá unha atención integral, coherente e adaptada ás necesidades das vítimas de violencia de xénero que presentan problemas de adiccións grazas á acción conxunta e coordinada desde distintos ámbitos do social e o sanitario, segundo indican nun comunicado.

A iniciativa, financiada polo Ministerio de Dereitos Sociais, Consumo e Axenda 2030, márcase dentro do proxecto do Observatorio de Violencia de Xénero da UNAD, desde onde tamén se lanzaron outros proxectos como as formacións en materia de drogas e violencia de xénero a axentes das Unidades de Atención á Familia e Muller da Policía Nacional.

Con esta acción, UNAD e o CIDH Diversitas replican un modelo xa implantado en Salamanca e Murcia, onde senllos grupos de axentes sociais do territorio xa están a posibilitar unha resposta “máis segura e sensible” ante os casos de mulleres con adiccións vítimas de violencia de xénero.