O Consello da Xunta de Galicia aprobou este luns de maneira definitiva o Proxecto de Interese Autonómico (PIA) para o desenvolvemento da Cidade Deportiva Afouteza-GS360, cuxas obras comezarán “de maneira inmediata”, segundo informou o conxunto galego.

O equipo vigués apuntou que este trámite “supón a culminación” do proceso que iniciou hai dous anos “para revolucionar a industria do deporte galego e impulsar o crecemento do club, que con esta actuación logrará potenciar e fortalecer a súa canteira e situarse como un referente na formación académica e deportiva a nivel internacional”.

O futuro complexo deportivo contará con tres agrupacións de infraestruturas: a Cidade Deportiva Afouteza, o Centro Integral para a Capacitación da Industria do Deporte e a área de servizos. Durante estes dous anos, o RC Celta lembra que traballou de maneira intensa, en estreita colaboración e co apoio da administración autonómica “dada a importancia estratéxica do proxecto para Galicia”, co obxectivo de cumprir “de maneira exemplar” coas esixencias establecidas para recibir a catalogación de pé, con especial coidado na protección do medioambiente e dos mananciais e balsas de auga na súa contorna ou no seu ecosistema natural (bosque autóctono e augas), unha tarefa que propiciou un histórico acordo coa Mancomunidade de Montes de Tameiga.

O club galego insiste en que este proxecto “suporá un antes e un despois” na súa historia e na do “deporte galego” xa que esta Cidade Deportiva contempla a construción dun mini estadio para 4.000 espectadores, e cinco novos campos de adestramento para os equipos xuvenís e cadetes de RC Celta e As Celtas.

Ademais, contará cun Centro de Formación, onde se impartirán ciclos universitarios e de FP en materias relacionadas coa saúde e o deporte, unha residencia para os xogadores da canteira e de Academys e para estudantes, unha zona de restauración para dar servizo ao complexo e un hotel para visitantes, deportistas e participantes nos eventos de carácter académico, cultural e social que se organicen. A infraestrutura culminará con dúas zonas dedicadas a clínica deportiva e innovación no deporte.”

Esta medida chega logo de que a Xunta declarara este proxecto como de interese autonómico. “O RC Celta quere agradecerlle á Xunta de Galicia o seu apoio e para poder desenvolver un proxecto que impulsará o deporte galego e o crecemento do club, que coa Cidade Deportiva Afouteza- GS360 afronta un ilusionante futuro con novas expectativas”, sentenciou