A Federación de Asociacións de Veciños ‘Eduardo Chao’ de Vigo (Favec) decidirá en asemblea este xoves se acode aos tribunais para denuciar ao Concello olívico polo desaloxo da súa sede, unhas oficinas que a organización veciñal ocupou durante varias décadas, e das que saíu fai uns 4 anos con motivo dunhas obras, ata que a pasada semana culminouse o desaloxo definitivo.

Segundo informou a Favec a través dun comunicado, con este desaloxo, o Concello incumpre o convenio asinado en 2004, polo cal se cedía o uso do local á entidade durante un prazo de 25 anos. “Primeiro o Concello pechou a sede da Federación coa escusa das obras executadas na planta baixa que, en realidade, nunca afectaron as oficinas da Favec, e agora remata a operación resolvendo unilateralmente o convenio e desaloxando á Favec co único obxectivo de que a Federación cese totalmente a súa actividade”, denunciou a entidade.

Así mesmo, advertiu de que “o único interese” do alcalde, Abel Caballero, é “acabar coa voz crítica” da Federación e de todo o movemento asociativo veciñal “porque lle fai sombre e pon de manifesto os seus erros de xestión e mala administración”. No entanto, a Favec subliñou que estas “manobras” non van á acabar co labor social da entidade veciñal “nin coa denuncia pública de todas as actuacións do Concello ilegais e contrarias ao interese xeral”.

Por iso, nunha asemblea que se celebrará na tarde deste xoves, a Federación votará a posibilidade de acudir aos tribunais para reclamar a anulación dese desaloxo e a indemnización que corresponda.