O grupo municipal do BNG en Vigo denunciou este martes un novo “arboricidio” do goberno de Abel Caballero, ao que define como “alcalde-leñador”, tras unha talla de árbores con motivo do reinicio das obras no Canellón do Balado, entre as rúas Rosalía de Castro e Areal. Os nacionalistas censuraron que o goberno municipal “continúa actuando como un kamikaze ambiental”, e deixou en pé un único exemplar nesa zona, aplicando a súa “política de tallas absolutamente inxustificadas”. O portavoz do grupo, Xabier Pérez Igrexas, lamentou que Caballero “levou adiante a súa pretensión de retirar o arboledo coa humanización da zona”, a pesar das protestas veciñais, polo que o BNG esixirá explicacións na próxima Comisión Informativa de Medio Ambiente.