A cidade de Vigo acollerá no mes de marzo un encontro de Cámaras de Comercio dos diferentes territorios do arco atlántico, no que se abordará a cuestión da intercomunicabilidade, con asuntos como as infraestruturas, a enerxía eólica ou o hidróxeno verde sobre a mesa.

Así o avanzou o alcalde da cidade olívica, Abel Caballero, en declaracións remitidas aos medios tras manter unha reunión con responsables da Cámara de Comercio de Pontevedra, Vigo e Vilagarcía.

Segundo sinalou o rexedor na cita de marzo de falará das conexións territoriais, incluído o norte de Portugal, e haberá un “apartado específico” para abordar as comunicacións de Vigo co resto de Europa. “Todo o que ten que ver coas infraestruturas da cidade, o AVE directo a Madrid por Cerdedo, a autovía A-52 e o aeroporto vai ter un papel central nesta conferencia”, asegurou.

Igualmente, indicou que esta cita será unha boa oportunidade para que a cidade fale da súa situación e dos seus obxectivos en materia de infraestruturas de comunicación, de transporte de mercadorías ou de loxística.