AA candidata a liderar o PP vigués Luisa Sánchez prometeu a militantes unha “política de proximidade” que estea “a pé de rúa” e “en contacto co territorio” para centrarse no “día a día das persoas”.
Así o expuxo este mércores nun encontro coas bases do partido, ao que acudiron decenas de simpatizantes. Alí, Sánchez deu a coñecer as principais liñas do seu proxecto, que pasan por “o contacto co territorio”, o desenvolvemento dun “programa de cidade” e unha optimización da comunicación interna e externa. Na súa intervención, tras agradecer o “ánimo e afecto” recibido desde que anunciou a súa candidatura, a política viguesa reivindicou a súa intención de “mirar á xente aos ollos” e coñecer “a cada persoa polo seu nome”, acudindo a cada barrio para coñecer directamente as necesidades que hai.
Para iso, segundo recolle nun comunicado, emprenderá unha nova rolda de visitas a barrios e parroquias de Vigo no mes de marzo co obxectivo de elaborar un “mapa de necesidades” que contribúa a expor “unha proposta para cada problema”. Por outra banda, para ela a unidade debe ser un “punto crave” para que o PP de Vigo se volva a erixir nun “partido líder”. Neste sentido, chamou a aprender do pasado para “compartir o futuro”. “Non seremos a alternativa mentres sigamos dubidando de nós mesmos. Non achegaremos nada á cidade mentres non saibamos organizarnos entre nós”, profundou.
