O BNG de Vigo alertou do “avance descontrolado” dos pisos turísticos e pediu ao goberno local que “actúe dunha vez” para frear esta “ameaza especulativa” e que desenvolva inspeccións e unha ordenanza municipal para regulalos. Nun comunicado, o portavoz nacionalista, Xabier Pérez Igrexas, lamentou que a “falta de actuación” por parte do Concello supuxo un incremento das vivendas de uso turístico, o cal á súa vez incide “de maneira directa” na alza dos prezos do aluguer na cidade.

Igrexas criticou que o goberno local de Abel Caballero “non fixese nada durante os últimos anos”, pedindo que “deixe de mirar para outro lado” e estableza medidas para “frear en seco esta ameaza”. Así, reclama que o Concello leve a cabo inspeccións para determinar se todas as vivendas de uso turístico operan respectando a legalidade. Tamén pediu unha ordenanza municipal para limitalos. “Mentres os alugueres sexan imposibles, nin un piso turístico máis”, defendeu Igrexas.