A organización do Salón do Automóbil de Vigo prepara a feira deste ano, que se celebrará no Ifevi do 12 ao 16 de marzo, e avanza que os fabricantes chineses irromperán con forza, coa presenza de firmas como Omoda, Jaecoo, BYD, Leapmotor e MG. Nesta edición, a número 34, case 40 marcas estarán presentes no Instituto Feiral de Vigo, con gran variedade de automóbiles, desde os máis punteiros en tecnoloxía eléctrica e híbrida, pasando polos clásicos de combustión gasolinta e diésel.

As grandes protagonistas serán as marcas chinesas, e a organización, Eventos do Motor, apostará por dar un papel relevante á mobilidade do futuro, nun mercado en plena transformación. Nese ámbito, a tecnoloxía e competitividade de empresas chinesas sumaranse aos grandes fabricantes nacionais e internacionais. Así, estarán presentes marcas como Renault, Volkswagen, Tesla, Mercedes, Lexus, Jaguar ou KIA, entre moitas outras, que presentarán as súas últimas innovacións en mobilidade eléctrica.

Ademais da exhibición de vehículos, o Salón contará cunha rede de expertos e profesionais que asesorarán aos visitantes para resolver as súas dúbidas sobre os modelos máis adecuados ás súas necesidades, tanto de coches como de motocicletas. O evento abrirá as súas portas o 12 de marzo e, tanto ese día como o seguinte, o horario será de 16.00 a 21.00 horas. O venres 14, sábado 15 e domingo 16 o Salón abrirá de 11.00 a 20.00 horas.