O Xulgado do Contencioso Administrativo 2 de Vigo condenou ao Concello de Vigo a pagar á empresa Sweet Nocturna, promotora do concerto de Guns N’ Roses, máis de 1,5 millóns de euros polo patrocinio errado do evento, celebrado no estadio municipal Abanca Balaídos o 12 de xuño de 2023. O recurso deriva da negativa do Concello de pagar o devandito patrocinio, alegando que se tramitou un concurso público que, finalmente, quedou deserto. Pola súa banda, a empresa xustificou que, antes de que se pechase ese procedemento, xa había un “acordo recíproco” para a celebración do concerto e “actos preparatorios” anteriores á formalización do contrato.
Cando o Concello declarou deserto o concurso, a empresa reclamou ser compensada, pero a Xunta de Goberno desestimou as súas pretensións. A partir de aí, recorreu aos tribunais, e agora o Xulgado declarou que os acordos da Xunta de Goberno rexeitando as reclamacións de Sweet Nocturna son desconformes a Dereito. No seu fallo, condena ao Concello a abonarlle o prezo ofertado no procedemento de licitación, 1.563.000 millóns de euros, máis o IVE e os intereses correspondentes.
