O Concello de Vigo instalou este mércores unha escultura do escritor Domingo Villar co obxectivo de perpetuar “para sempre” o seu recordo na memoria dos cidadáns. O alcalde, Abel Caballero, asistiu á inauguración da estatua, situada nun banco da Alameda, subliñando que Villar foi “a crónica dun éxito excepcional”.

Acompañado da familia do autor, o rexedor lembrou a importancia da Praza de Compostela de Vigo na historia persoal de Villar. “Vivir nesta alameda é vivir no mar, porque isto era o mar e é un privilexio que Domingo coñecía e gozaba”, reivindicou. O alcalde retratou ao literato como “unha persoa marabillosa, amigo dos seus amigos, cunha alma inmensa e moi xeneroso”. “Domingo era Vigo, non só era de Vigo, era Vigo”, sentenciou.

Pedro Dobao, autor da escultura, recibiu a felicitación de Caballero pola súa obra, que inmortaliza a presenza de Villar na cidade. Pola súa banda, os familiares do escritor tamén deron as grazas ao Concello por esta homenaxe.