Axentes da Comisaría de Policía Nacional de Vigo-Redondela detiveron a un home como presunto autor dun delito de tráfico de drogas, no barrio de Bouzas.

Segundo informaron fontes policiais, a intervención tivo lugar o pasado 14 de xaneiro, cando o sospeitoso se atopaba nunha zona axardinada de Bouzas.

Efectivos da Unidade de Prevención e Reacción (UPR) identificárono e comprobaron que escondía, entre as súas roupas, varios recipientes que contiñan diversas cantidades de haxix preparadas para a súa venda, e diñeiro fraccionado na súa carteira. Por este feito, foi detido por un delito contra a saúde pública.

A Comisaría lembrou que os compoñentes da Unidade de Prevención e Reacción teñen como un dos seus labores actuar en determinados puntos de venda de sustancias estupefacientes a pequena escala. Estes puntos son localizados polas propias unidades mentres realizan labores de prevención, así como por informacións achegadas por cidadáns e polos propios grupos de investigación policiais.

Nos últimos meses a UPR detivo a varias persoas e desarticulado múltiples puntos de menudeo de droga en diferentes barrios da cidade de Vigo.

A maior parte destas actuacións desenvolvéronse na vía pública ou parques, e mesmo se procedeu á detención dalgunha persoa na contorna dun centro educativo. Algúns detidos foron sorprendidos ‘in fraganti’ vendendo sustancias estupefacientes.

ARRESTO DUN MOZO CON ORDE DE DETENCIÓN

Axentes da Policía Local de Vigo arrestaron este pasado xoves a un mozo, O.E.H. de Marrocos e 20 anos de idade, sobre o que pesaba unha orde de detención dun xulgado da Coruña mentres supostamente consumía droga na rúa.

Os feitos ocorreron sobre as 13.00 horas na vía Marqués de Valterra, onde os axentes observaron a un grupo de tres rapaces cuxa conduta inducía a pensar que estaban a consumir estupefacientes.

Así, procederon á súa identificación, comprobando que sobre un deles había unha orde de detención en vigor, sendo arrestado e posto a disposición da autoridade competente.