O BNG de Vigo criticou a “xordeira autoritaria” do goberno local de Abel Caballero e do Ministerio de Transportes e Mobilidade Sustentable e pediu que se escoite aos veciños afectados pola ampliación da autovía A-52 e polo proxecto de viario PO-010. Nun comunicado, os nacionalistas mostraron o seu rexeitamento aos trazados previstos para estas dúas infraestruturas, xa que supoñen “importantes afectacións en parroquias rurais da cidade”, polo que defenderon que se estuden “outras alternativas máis eficientes, sustentables e con menor impacto”.
“É indefendible que se pretenda impor un trazado sen o máis mínimo diálogo e sen abordar en serio outras posibilidades”, lamentou o portavoz municipal do BNG, Xabier Pérez Igrexas, tras manter unha reunión coa plataforma Bembrive en Pé. Igrexas avanzou que levará a cabo máis encontros con colectivos veciñais afectados ante a “xordeira autoritaria” do Concello e do Ministerio, “tratando de impor un percorrido para a nova autovía con graves impactos ambientais e sociais no rural vigués”. “Non podemos seguir tratando parroquias como Bembrive ou Beade como páramos que encher de asfalto ou cemento”, criticou o nacionalista, que pediu corrixir o trazado e liberar a peaxe da AP-9 no tramo que vai en paralelo á actual autovía.
