O Consello do campus de Pontevedra da Universidade de Vigo aprobou este xoves o plan estratégido do proxecto de especialización ‘Campus Crea‘ para o período 2024-2027, no que se recollen as liñas de actuación e obxectivos deste proxecto, así como os seus eixos de especialización.
Así, nesta sesión do Consello, presidida polo reitor da UVigo, Manuel Reigosa, deuse luz verde a un documento (que ten que ser referendado polo Consello de Goberno da institución académica) que permitirá avanzar no proceso de especialización do campus, pondo o foco nas titulacións máis relacionadas coa creatividade.
Deste xeito, defínense catro liñas de especialización: creatividade e arte, creatividade e comunicación, creatividade e deseño, e creatividade e sociedade, centrada esta última na educación, como elemento transversal. ‘Campus Crea’ vincula catro facultades, 17 títulos de grao, máster e doutoramento, máis dun centenar de docentes e unha ducia de grupos de investigación.
Con respecto ao plan de acción, defínense tamén catro liñas de actuación para dar resposta a tres retos prioritarios: ser elemento aglutinador de actividades de docencia, investigación, transferencia e divulgación; potenciar a colaboración entre grupos de investigación e co tecido produtivo; e situar márcaa ‘Campus Crea’ no ámbito social, económico e empresarial.
INSTITUTO DE INVESTIGACIÓN
Por outra banda, o reitor da UVigo confirmou que comezarán os traballos para a creación dun instituto de investigación no campus de Pontevedra, enfocado en temas relacionados co deporte, a educación e áreas afíns. Este proceso estará dirixido polo Vicerreitorado de Investigación, Transferencia e Innovación, e iniciarase o traballo cos diferentes grupos que poderán adherirse a este instituto, pondo en marcha un proceso participativo para definir as futuras liñas de traballo.
Unha vez definidas esas liñas, elaborarase a normativa antes de aprobar a súa creación nos órganos de goberno da UVigo. Con todo, previamente é necesario definir “unha comunidade de intereses en canto ás liñas de investigación”, segundo matizou o reitor. Finalmente, o reitor referiuse, entre outros asuntos, aos “excelentes” datos de matrícula no Campus de Pontevedra, cunha taxa de ocupación do 107 % nas prazas de novo ingreso.
