O Tribunal Superior de Xustiza de Galicia (TSXG) recoñeceu o dereito dun funcionario do Concello de Vigo a cobrar produtividades por asumir máis funcións das que lle correspondían como xefe do departamento de Comercio, despois de que esta concellaría empezase a encargarse tamén da xestión de eventos como o Nadal e outras “festas especiais”, o que supuña un maior esforzo, dedicación e responsabilidade para este traballador municipal.
O traballador, funcionario de carreira do Concello olívico, ostenta desde o ano 2016 o posto de xefe de Comercio. No ano 2019, prodúcese unha reorganización na estrutura de goberno municipal, e atribúense á área de Parques, Comercio e Distritos tamén as competencias en Festas Especiais. Nesa resolución, ademais, atribúense expresamente a este traballador “competencias e funcións non adscritas ao seu posto, relacionadas con festas e eventos culturais de carácter especial para a cidade”, aínda que xa viña desempeñándoas desde 2018.
Tras ese cambio, o funcionario reclamou, ata en tres ocasións, o cobro das produtividades vinculadas a ese aumento de carga de traballo polo “especial rendemento e actividade laboral extraordinaria”, con maior dedicación fóra da súa xornada ordinaria, entre os anos 2018 e 2022. Salvo no caso do ano 2020, no que se lle recoñeceron as produtividades (por valor de algo máis de 4.500 euros), as súas pretensións non foron atendidas.
O funcionario levou o seu caso aos tribunais e o xulgado do Contencioso Administrativo 2 de Vigo estimou parcialmente o seu recurso, declarando o dereito do traballador a cobrar esas produtividades. O Concello de Vigo presentou recurso e, nunha sentenza de novembro pasado, o Tribunal Superior de Xustiza de Galicia (TSXG), confirmou a sentenza do xulgado vigués.
