A Xunta de Galicia autorizou este venres o contrato co Hospital Povisa para a asistencia sanitaria especializada na área de Vigo por un importe de 194.732.064 euros e un período de vixencia inicial de dous anos.
Así o anunciou o presidente da Administración autonómica, Alfonso Rueda, na comparecencia de prensa posterior á celebración do Consello da Xunta. Segundo explicou, o obxectivo é prestar asistencia sanitaria especializada a unha poboación estimada de ao redor de 116.000 persoas que “libremente así o elixa”, asignada aos centros de saúde dos municipios de Cangas, Moaña, Baiona, Nigrán, Gondomar e aqueloutros que se determinen do municipio de Vigo.
O contrato autorizado Xunta terá unha vixencia inicial de dous anos, desde o 1 de abril de 2025 ata o 31 de marzo de 2027, polo que se autoriza tamén unha prórroga ata principios de abril. O acordo poderá ser prorrogado por tres anos máis, co que podería alcanzar un valor estimado de 525,7 millóns de euros.
Ao comezo do contrato, será a poboación de referencia que se atope protexida no marco do concerto vixente co Hospital Povisa a que reciba asistencia sanitaria especializada. Unha vez transcorrido un ano desde a entrada en vigor do novo contrato, en cada exercicio establecerase un prazo de 30 días naturais para que os usuarios que así o desexen exerzan o seu dereito de elección, que levará implícita a permanencia anual.
PAGO POR SERVIZO
Explicou tamén que o número de procesos asistenciais recollidos no contrato de servizos é estimativo — o cálculo fíxose tendo en conta a actividade realizada no ano 2023, último ano completo pechado –, polo que o prezo final que se abonará ao adxudicatario virá determinado polo número de procesos previstos na carteira de servizos que realmente se presten á poboación adscrita ao centro sanitario.
Sobre isto, destacou que con este contrato a Administración autonómica cambia a tipificación do contrato para a prestación da asistencia sanitaria especializada na área de Vigo, pasando do actual concerto a un contrato de servizos, polo que o adxudicatario ten o deber de prestar asistencia sanitaria para os procesos incluídos na carteira de servizos que se recollen nos pregos.
Con este novo modelo o Goberno galego pagará só polos procesos que realmente se realicen á poboación de referencia e reforzará o control sobre a actividade prestada pola adxudicataria. Para garantir o correcto funcionamento do servizo e velar pola calidade asistencial que se presta á poboación de referencia, crearase unha unidade de supervisión e control para o seguimento do contrato.
PROCESOS INCLUÍDOS
A atención especializada recollida no novo contrato inclúe, entre outros, asistencia especializada en consultas; asistencia no hospital de día e procesos de cirurxía maior ambulatoria; hospitalización en réxime de internamento; hospitalización domiciliaria; procedementos diagnósticos e terapéuticos, e urxencias hospitalarias.
Así mesmo, para asegurar a calidade e adecuación dos recursos materiais, medios e instalación empregados na prestación dos servizos, a entidade estará obrigada á realización de investimentos en obras para a mellora da instalación e adquisición dos equipamentos que resulten necesarios para o correcto desenvolvemento da actividade, destinando a este fin un mínimo dun 3% do importe anual do contrato.
Así mesmo, o adxudicatario asume o deber de aplicar os incrementos retributivos pactados no convenio colectivo. Concretamente en 2025 debe aplicar unha subida dun 3 % para os profesionais da entidade.
