A Xunta de Goberno do Concello de Vigo deu luz verde este luns, nunha sesión extraordinaria, a resolución da convocatoria das bolsas de comedor para estudantes da cidade, e aprobou a concesión de 4.038 axudas, cunha dotación económica de 1,72 millóns de euros.

Segundo informou o alcalde, Abel Caballero, nunhas declaracións remitidas aos medios, desde o pasado venres os colexios da cidade xa dispoñen da listaxe de familias beneficiarias das axudas.

Neste curso, asignáronse 82 bolsas máis que no curso pasado, e a dotación económica das axudas creceu. “En Vigo non hai nin un só neno ou nena en lista de espera”, subliñou o rexedor, que volveu a lembrar que ese tipo de axudas son “obrigación e competencia” da Xunta de Galicia, que recibe fondos do Goberno central para ese tipo de bolsas.

Con todo, incidiu, na cidade olívica son asumidas polo Concello. A que dedica o diñeiro a Xunta? Onde mete o diñeiro que lle quita á xente que o necesita?”, cuestionou Caballero.

Por outra banda, o alcalde tamén informou da aprobación para contratar as obras de reforma da piscina de Teis, un proxecto no que se investirán case 7 millóns de euros para facer unha instalación “practicamente nova”, tras o incendio que sufriu esta piscina en maio de 2022.

Segundo explicou Caballero, as obras arrincarán no primeiro semestre de 2025 e o prazo de execución aproximado é de 2 anos. Ademais da reforma da fachada e a cuberta, renovarase todo o sistema eléctrico, ampliaranse os aseos e vestiarios, crearanse novas salas para actividade deportiva, mellorarase a eficiencia enerxética e a protección contra incendios.