A Asociación de Veciños e Empresarios de Cabral (Aveeca) alertou de que a Comunidade de Montes en Man Común de Santa Mariña de Cabral continuou levando a cabo unhas obras no nacemento do río Lagares a pesar de ser paralizadas a mediados de novembro.
Nun comunicado, Aveeca informou de que a Dirección Xeral de Patrimonio Natural da Xunta de Galicia e o Servizo de Protección da Natureza da Garda Civil (Seprona) están a tramitar actuacións contra os comuneiros por uns novos traballos de canalización de regatos e nacentes nunha área de protección natural moi preto do nacemento do río Lagares.
Así, hai días Aveeca interpuxo unha denuncia ante Augas de Galicia e Patrimonio Natural e o Concello de Vigo por este caso, tras detectar Seproma estes feitos. Precisamente, segundo Aveeca, a visita dos axentes da Garda Civil, o pasado 14 de novembro, derivou na paralización dos traballos.
“Pero Aveeca constatou nestes últimos días que os comuneiros decidiron continuar adiante”, alertaron. Na súa denuncia, a entidade responsabiliza directamente dos traballos ás mesmas persoas e empresas que xa realizaron en outubro de 2023 outra “controvertida” actuación nunha zona moi próxima. “É dicir, aos comuneiros de Cabral”, sentenciaron.
