Tres anos van xa desque o poeta Carlos Oroza nos deixou. Pero segue vivo na súa poesía, esa que agora a Editorial Elvira recupera no libro-disco ‘Aute canta a Oroza’ e que serve de motor para as distintas homenaxes que se lle están facendo en Vigo.
A primeira foi no cemiterio de Pereiró, o pasado xoves, onde se recitou un dos seus poemas e descubriuse unha placa na súa memoria. A segunda grande homenaxe foi ese mesmo día na sala de conferencias de Afundación, onde se celebrou a mesa redonda ‘Carlos Oroza, o poeta oral’, na que participaron Javier Romeu, director da Editorial Elvira, Javier Monforte, produtor musical á fronte do libro-disco, o crítico de arte Antón Castro e Antón Patiño, escritor e pintor amigo de Oroza.
Alí congregouse unha boa representación do mundo cultural, pero tamén político da cidade: o deputado provincial Carlos López Font, a concelleira de Cultura Uxía Branco, o poeta Marcos de la Fuente, as escritoras Alicia Borrás, Graciela Baquero e María Lado…
E o venres chegou o gran fasto, no auditorio de Afundación, onde se presentou ‘Aute canta a Oroza’, ao que acudiu o irmán do cantautor, José Ramón, en representación do artista, cun estado de saúde delicado. Alí citáronse eses nomes que dan ‘glamour’ a este tipo de actos, destacando a presenza do alcalde de Vigo, Abel Caballero, e do escritor Xosé Luís Méndez Ferrín.
E así foi o acto, en imaxes:
