Axentes da Policía Nacional detiveron a un veciño de Chapela como presunto autor dun delito de tráfico de drogas, por dedicarse supostamente á distribución de estupefacientes polo miúdo nesta parroquia redondelana e tamén na área de Vigo. Segundo informaron fontes policiais, a investigación comezou por mor de informacións recibidas sobre un home residente en Chapela que se estaría dedicando á venda de drogas a pequena escala. A Policía puido constatar que o sospeitoso realizaba as transaccións desde o seu vehículo.

O home quedaba cos compradores en distintos puntos de Redondela e Vigo, e entregáballes a mercadoría, ás veces haxix e ás veces cocaína, sempre en pequenas doses. O sospeitoso facíao a través do portelo do coche, ou no interior, nun breve lapso de tempo no que o ‘cliente’ entraba no vehículo. O sospeitoso foi detido o pasado 13 de novembro e posto a disposición xudicial. Nos últimos seis meses, o grupo de Policía Xudicial de Redondela realizou outras dúas operacións contra o menudeo nesta localidade, unha en maio e outra en outubro, desactivando outros dous puntos negros de venda de drogas.