O comité de empresa de Vitrasa, a concesionaria do transporte urbano do Concello de Vigo, criticou unha vez máis a actitude da compañía, porque desaproveitou unha oportunidade para chegar a un acordo sobre o convenio colectivo e “condena á cidade a sufrir novamente as mobilizacións do persoal”. Nun comunicado, tras dúas xornadas de mediación, os representantes dos traballadores lamentaron que a dirección de Vitrasa “non foi capaz de realizar unha oferta que permitise desbloquear a negociación”. Por iso, a partir deste mércores reactivaranse as mobilizacións en forma de paros parciais.
“Durante o primeiro día de reunión, a concesionaria non presentou nada novo a pesar de solicitar eles a mediación, aludindo novamente ás perdidas de viaxeiros e a que o reequilibrio recibido por parte do Concello de Vigo de máis de 18 millóns de euros non lle permite cubrir as perdas derivadas da pandemia”, explica o comité. No segundo encontro, levado a cabo na tarde deste pasado martes, a postura empresarial “cambiou un pouco”, expondo un aumento da proposta rexeitada fai máis dun mes por parte do comité, do 0,5 % no ano 2025 a cambio de eliminar a prima de absentismo (sobre 350 euros por traballador).
“Á parte deste mínimo incremento por parte da concesionaria, as tan necesarias melloras sociais que reivindican os traballadores non foron atendidas; pretendendo que o persoal estea dispoñible as 24 horas e expondo un mínimo descanso na xornada de tan só 5 minutos cada 3 horas de condución, factores que empeoran notablemente as actuais condicións do persoal de condución e que influirían negativamente na seguridade dos viaxeiros”, insisten. O comité indicou que nun último intento de desbloquear o conflito solicitou un incremento do 0,9 % sobre a oferta realizada pola empresa para o 2024, que foi negado pola dirección e que puxo punto e final á mediación. Por iso, os empregados mostráronse “moi defraudados” con Vitrasa.
“A día de hoxe ademais de estar a perder máis do 14 % de poder adquisitivo e de deixar claro á empresa que renunciabamos a recuperar os salarios perdidos, o que supón un aforro de máis de 3,5 millóns de euros para Vitrasa polos anos 2021 a 2023, néganse a pechar un acordo por unha cantidade tan ínfima como 135.000 euros despois de recibir millóns (estes 135.000 sería o que lle suporía á empresa o 0,9 % que solicitou o comité, segundo os seus cálculos)”, sentenciaron. Por todo iso, fixeron un chamamento ao Concello de Vigo para que non renoven a concesión e criticaron os “abusivos” servizos mínimos impostos polo goberno local.
RESPOSTA DE VITRASA
Pola súa banda, Vitrasa saíu ao paso reivindicado os “esforzos” da compañía por chegar a un acordo, nun encontro que durou máis de sete horas. Segundo as súas cifras, a súa proposta de mellora salarial acumula un incremento superior ao 18 % ata 2027, así como outros beneficios como a posibilidade de acollerse a xubilación parcial desde o 1 de xaneiro a certos traballadores e melloras nos pluses de Nadal. “A pesar das amplísimas melloras que supoñen todas estas medidas, a representación legal dos traballadores impedirá que o persoal poida valorar a oferta, privándoo do dereito a tomar unha decisión sobre esta proposta”, indicou a compañía, subliñado que a decisión de continuar cos paros prexudica á cidadanía e aos empregados. Ademais, reivindicou que desde que Vitrasa opera en Vigo, os traballadores gañaron poder adquisitivo, porque os soldos subiron “máis do dobre” que o IPC desde 1995.
