O maxistrado do Xulgado de Instrución número 8 de Vigo, en funcións de garda, decretou o ingreso en prisión provisional, comunicada e sen fianza, do detido como presunto autor do atraco a unha sucursal bancaria da parroquia viguesa de Beade. En concreto, segundo confirma o TSXG, o home está investigado por un delito de roubo con violencia e intimidación en establecemento aberto ao público.
Os feitos ocorreron o pasado martes. O atracador, un home alto vestido con cazadora escura, entrou na sucursal, situada no número 10 da rúa Coutada, e ameazou con prender lume tras asperxer con gasolina unha mesa da sucursal. Finalmente, logrou facerse cun botín duns 600 euros. Posteriormente, deuse á fuga nun vehículo en dirección a Bembrive, iniciándose unha procura que terminou coa súa detención este xoves.
