O Servizo Galego de Saúde (Sergas) ofrece a pacientes de Oncoloxía da área sanitaria de Vigo e da de Pontevedra tratarse no Complexo Hospitalario Universitario de Ourense (CHUO), ante o incremento da demanda en radioterapia. Así o confirman a Europa Press fontes da Consellería de Sanidade, que subliñan que a intención é “axilizar” a atención. En todo caso, estes traslados son de doentes en “unha situación adecuada” e por “criterios xeográficos”.
Isto empezouse a facer debido ao incremento “nos últimos anos” dos pacientes que se someten a radioterapia no Hospital Meixoeiro de Vigo, que recibe non só a persoas con domicilio na área sanitaria da cidade olívica, senón tamén de Pontevedra-O Salnés. De acordo con cifras da Consellería de Sanidade, entre os meses de xaneiro e agosto deste ano o servizo de radioterapia atendeu a 1.925 persoas, medio cento máis que no mesmo período de 2023, cando foran 1.871.
Cómpre lembrar que en setembro transcendeu que o Meixoeiro estaba a citar a pacientes con cancro de madrugada para someterse a radioterapia. Naquel momento, ocorría tamén que eran derivados desde Ourense pola renovación das máquinas do CHUO. De feito, tal e como explica Sanidade, o horario ampliado no hospital vigués continúa actualmente pero “só” para aqueles doentes “que, por motivos clínicos, deben manter un horario sempre similiar nas súas sesións”.
CABALLERO CRITICA O TRASLADO: “É UNHA MOCIÓN DE CENSURA DA XUNTA A SI MESMA”
Sobre esta cuestión, o alcalde de Vigo, Abel Caballero, manifestou este mércores o seu “descontento” e “desacordo” coa decisión do Sergas. Nunhas declaracións enviadas aos medios, o rexedor olívico cuestionou “por que non se dá o tratamento en Vigo” e “por que non hai en Vigo capacidade e persoal” para que eses pacientes fagan o seu tratamento na cidade. Tras constatar a “imprevisión e mal servizo” da Xunta en materia de Sanidade en Vigo, Abel Caballero subliñou que o Sergas “mete unha enorme presión” aos profesionais sanitarios para que atendan á xente, “e aínda enriba teñen que levar a xente a Ourense”.
Por iso, reclamou “máis persoal e máis instalacións” para estes tratamentos, e constatou que a oferta aos enfermos para que se traten fóra de Vigo é “unha moción de censura da Xunta e do Sergas a si mesmos”, unha “moción de censura á xestión da Sanidade en Vigo nos últimos 10 anos”. Finalmente, trasladou o seu apoio e recoñemento aos profesionais da Sanidade en Vigo, e insistiu en que é “intolerable” que a xente da cidade teña que recibir as súas terapias en Ourense. “Esta Xunta é unha calamidade”, sentenciou.
