A Policía Local de Vigo detivo a un home de 56 anos de idade como presunto autor dun delito de violencia de xénero e outro de quebrantamento de medida, tras agredir á súa parella, da que ten unha orde de afastamento.
Segundo informaron fontes policiais, os feitos ocorreron na noite do pasado luns, cando o 092 recibiu un aviso para acudir á praia dos Olmos, preto de Samil, onde se estaba producindo unha rifa de parella.
Ao chegar, os axentes viron á parella no interior dunha tenda de campaña. Ao decatarse da presenza policial, o home tratou de espertar á muller que, aparentemente, estaba desmaiada; pero esta non reaccionou ata que o home saíu da tenda.
A muller explicou aos axentes que tivera unha discusión co home, a súa parella, e presentaba unha lesión recente na cella esquerda. Aínda que inicialmente dixo que era unha ferida producida por accidente, finalmente recoñeceu que, no transcurso da discusión, a súa parella empuxáraa, e que ela se caeu e golpeouse contra unha roca.
Esta versión foi corroborada por varias testemuñas, que observaran claramente a agresión. Ademais, os policías comprobaron que o home ten en vigor unha orde de afastamento con respecto a ela, ditada polo xulgado de instrución 3 do Porriño. Por todo iso, procederon á súa detención.
