Miles de persoas manifestáronse na tarde deste mércores en Vigo para esixir á Xunta de Galicia que “repense o modelo” educativo e contrate máis profesores de apoio, necesarios para nenos con necesidades especiais.
A protesta, organizada pola Asociación de Directoras e Directores de Colexios Públicos de Vigo (Adicopuvi) e a Federación Olívica de Asociacións de Nais e Pais do Alumnado de Vigo e comarca (Foanpas), partiu minutos despois das 19.00 horas do cruzamento de Vía Norte con Urzaiz.
Nela, preto de dous mil profesores, pais e alumnos lamentaron a situación “insustentable” vivida nos centros educativos neste inicio de curso.
Encabezada por unha pancarta que rezaba ‘Infancia=Diversidade. Por unha escola inclusiva’, a manifestación contou tamén con multitude de carteis coas reivindicacións concretas de múltiples colexios públicos da cidade. Durante a mesma, ouvíronse berros pedindo a dimisión do conselleiro de Educación, Ciencia, Universidades e Formación Profesional, Román Rodríguez.
A presidenta de Foanpas, Iria Salvande, mostrou o seu orgullo pola cantidade de xente congregada para pedir á Consellería que non saque “parches”, como é, ao seu xuízo, o Plan PROA +, “que o que fixo foi detraer recursos estables cubríndoos con fondos que veñen de Europa”.
“Non nos parece de recibo. Algo que debería ser bo, que era un apoio, está a substituír o pouco que tiñamos. A Consellería ten que repensar un pouco o modelo e a asignación de prazas, cun catálogo que está obsoleto“, subliñou.
Ela desmentiu as palabras do presidente da Xunta, Alfonso Rueda, e de Rodríguez, que a semana pasada dixeron que este ano hai máis profesores e menos alumnos nos colexios de Galicia.
“A realidade é que non hai máis profesores que o ano pasado. Se collemos unha radiografía do que hai, amortizaron moitas prazas de xente que se xubilou. Eu vin os datos de Galicia e saqueinos da Consellería e hai 98 profesores menos que o ano pasado e vémolo nos centros, que hai menos profesores de apoio”, insistiu.
A manifestación tamén contou co apoio do BNG. O seu portavoz local, Xabier Pérez Igrexas, lamentou a “política de recortes” do PP, que desembocou nun inicio de curso con “peores condicións” que o ano pasado.
“Estamos alarmados ante un Goberno galego que lle dá as costas ao alumnado con necesidades específicas de apoio”, engadiu, criticando a supresión de persoal de pedagoxía terapéutica e de audición e linguaxe.
