Representantes da dirección de PSA Peugeot Citroën en Vigo e dos diferentes sindicatos constituirán unha comisión que iniciará, a próxima semana, negociacións encamiñadas á aplicación dun Expediente de Regulación de Emprego de carácter suspensivo, e que afectará os operarios da liña de montaxe M1 –onde se fabrican os modelos Peugeot 301 e C-Elysée–.

Así o confirmaron a Europa Press fontes da empresa, que explicaron que esta decisión responde os problemas de baixa demanda e baixa produción deses utilitarios. De feito, esa liña de montaxe xa tivo e seguirá tendo paradas ao longo do que queda de ano precisamente por esas circunstancias.

As negociacións cos sindicatos comezarán a próxima semana e ademais do ERE prevense outras “medidas de industrialización” que afectarán, non só aos 400 operarios que traballan exclusivamente nesa liña de montaxe, senón a máis empregados que realizan labores nesa e outras áreas.

A empresa tampouco avanzou a duración desta medida, aínda que sinalou que o ERE negociarase coa idea de manter a regulación de empregos en tanto duren as actuais circunstancias de baixa produción.

Así, tendo en conta as previsións da propia factoría, a regulación podería estenderse a boa parte do ano 2019, xa que se espera que a cadencia de produción non aumente até finais dese ano –coincidindo coa fabricación do novo modelo, o todocamino coñecido como proxecto V20–.