A Plataforma SOS Sanidade Pública da área de Vigo esixiu “responsabilidades políticas” aos culpables de elixir o modelo de concesión do Álvaro Cunqueiro de Vigo, reivindicando que se rescate para o público devandito centro hospitalario.
En rolda de prensa, o portavoz da organización, Manuel González Moreira, lamentou as “consecuencias directas para a cidadanía” que tivo a decisión de optar por unha concesión da infraestrutura e dos servizos non sanitarios.
El puxo o foco en que isto supuxo obrigar á cidadanía, cos seus impostos, a pagar “470 millóns de euros de máis”, polo que “non pode quedar impune”. “Pedimos para esas persoas responsabilidades políticas”, reivindicou, sen nomear directamente a ningún alto cargo, insistindo en que ten que ser a sociedade a que tamén solicite isto para que “non poidan seguir en cargos públicos”.
“Parece evidente que as persoas que tomaron decisións políticas sobre o cambio de modelo de licitación hipotecaron a futuro da área Sanitaria de Vigo e esas persoas teñen que ter responsabilidades políticas”, sentenciou.
González tratou de explicar que supuxo esa licitación, a través do informe do Consello de Contas, indicando que a construción do hospital trouxo consigo menos camas das que se proxectaron e menos metros cadrados. Ademais, non levou a cabo unha reforma estrutural da Atención Primaria, a cal tamén ía realizarse, segundo dixo.
Por todo iso, lamentou as actuais listas de espera que “sofren” os cidadáns de Vigo e a súa área e a necesidade de seguir utilizando recursos privados para atender a pacientes, referíndose ao hospital Povisa.
